Серҳат Қилич 51 ёшида вафот этди

Туркиялик таниқли актёр Серҳат Мустафо Қилич 51 ёшида вафот этди. У 5 сентябрь куни Истанбулнинг Кагитҳона туманидаги уйида ўлик ҳолда топилган.

 

Маълумотларга кўра, актёрдан қарийб икки кун давомида хабар олинмаган. Шундан сўнг унинг 8 йилдан бери бирга яшаб келган севгилиси Ўзлем Эсмергул уйига бориб, Қилични меҳмонхонадаги креслода ҳаракатсиз ҳолда топган. Воқеа жойига полиция ва тез тиббий ёрдам ходимлари чақирилган.

 

Дастлабки текширувда актёр танасида кесилган, яраланган ёки калтакланганлик излари аниқланмаган. Унинг жасади Адвокатлик тиббиёт муассасасига юборилган ва экспертиза ўтказилган. Ўлим юзасидан тергов давом этмоқда.

 

Қиличнинг яқинлари унинг соғлиғи билан боғлиқ муаммолари бўлганини билдирган. Бироқ актёрнинг ўлимига айнан қандай сабаб олиб келгани ҳозирча расман эълон қилинмаган.

 

7 сентябрь куни актёр билан Истанбулдаги Муҳсин Эртуғрул саҳнасида хайрлашув маросими бўлиб ўтди. Тадбирда унинг яқинлари, дўстлари ва санъат оламининг кўплаб вакиллари қатнашди. Маросимда Серҳат Қиличнинг саҳнадаги фаолияти ва ижодий йўли ёдга олинди.

 

Маросимда Шорай Узун, Алина Боз, Умут Эвирген, Сонгюл Ўден, Мелиса Дёнгел, Эртан Сабан, Айча Бингўл, Аҳмет Мумтаз Тайлан, Ҳазар Эргўчлю ва Шевкет Чорух каби санъаткорлар иштирок этган.

 

Серҳат Қиличнинг жасади маросимдан сўнг Анқарага олиб кетилади. 8 сентябрь куни Анқарадаги Аҳмет Ҳамди Ақсеки масжидида жаноза намози ўқилиб, актёр дафн этилиши режалаштирилган.

 

Серҳат Мустафо Қилич 1975 йил 8 июль куни Анқарада туғилган. У «Эзель», «Секcенлер», «Сўз», «Қурулуш Усмон» ва «Тaшкилoт» каби машҳур сериаллардаги роллари билан кенг танилган.