Жанубий Кореяда 19 нафар Ўзбекистон фуқароси қидирувга берилди

 

Жанубий Кореяда хорижда жиноят содир этгани учун қидирувда бўлган 110 нафар чет эл фуқароси яшириниб юргани аниқланган. Уларнинг 19 нафари Ўзбекистон фуқароларидир. Бу ҳақда Миллий полиция агентлиги маълумотларига таяниб, The Korea Times хабар берди.

 

Миллий полиция агентлиги маълумотларига кўра, 12 август ҳолатида Интерпол орқали қидирув эълон қилинган хорижий фуқаролар орасида Хитой фуқаролари 40 нафар билан энг катта улушни ташкил этган. Кейинги ўринларда Ўзбекистон — 19 нафар, Мўғулистон — 17 нафар ва Ветнам — 13 нафар фуқароси қайд этилган.

 

Қидирувдаги шахслар билан боғлиқ жиноятлар орасида фирибгарлик энг кўп учрайди — 47 та ҳолат. Шунингдек, одам ўғирлаш, ноқонуний қамоқда сақлаш, болалар ва ёшларни ҳимоя қилишга оид қонунларни бузиш ҳамда фоҳишалик билан боғлиқ 29 та ҳолат қайд этилган.

 

Гиёҳванд моддалар билан боғлиқ жиноятлар 7 та, ўғирлик, йўл ҳаракати қоидаларини бузиш, тан жароҳати етказиш ва ҳужум билан боғлиқ ҳолатлар эса 5 тани ташкил қилган.

 

Жанубий Корея полицияси Интерпол сўрови асосида қидирувдаги шахсларнинг эҳтимолий жойлашуви аниқланган ҳудудлардаги полиция бўлинмаларига уларни ҳибсга олиш бўйича маълумот юбормоқда.

 

Агентлик бу йил халқаро ҳамкорлик доирасидаги ходимлар сонини 22 нафардан 64 нафаргача оширган. Шунингдек, хорижий давлатларга қайтарилган шахслар сони ўтган йилги 13 нафардан 2026 йил августига келиб 24 нафарга етган.