2025 йилда Ўзбекистон экспорти 33,5 миллиард долларга, хорижий инвестициялар эса 43 миллиард долларга етди

 

Президент Шавкат Мирзиёев иқтисодий дипломатияни кучайтириш орқали экспорт ва инвестициялар ҳажмини ошириш давлат сиёсатининг устувор йўналиши эканини таъкидлади.

 

Қайд этилишича, иқтисодий дипломатия янги иш ўринларини яратиш, аҳоли даромадлари ва турмуш даражасини ошириш орқали инсон қадрини юксалтиришга хизмат қилади. Иқтисодий хавфсизлик эса давлат хавфсизлигининг мустаҳкам пойдевори ҳисобланади.

 

Икки ва кўп томонлама тадбирлар доирасида 2025 йилда умумий қиймати 160 миллиард долларлик инвестиция лойиҳалари ва савдо шартномалари бўйича битимлар имзоланди. Тарихда илк бор ташқи савдо айланмаси 80 миллиард доллардан ошиб, экспорт ҳажми 33,5 миллиард долларга етди. Хорижий инвестициялар оқими эса 43 миллиард доллардан ошди.

 

Ўтган йили 75 та давлатга экспорт ҳажми қарийб 4,5 миллиард долларга кўпайгани алоҳида таъкидланди. Элчилар хорижий инвесторлар ва йирик компаниялар билан тизимли ишлаган тақдирда, ушбу кўрсаткичларни янада ошириш учун салоҳият мавжудлиги қайд этилди.

 

Мисол тариқасида Ироқ бозори келтирилди. Ушбу мамлакат ички эҳтиёжни қоплаш учун ҳар йили қарийб 100 миллиард долларлик маҳсулотни импорт қилади. Шу муносабат билан Ироқдан 150 та йирик компания Ўзбекистонга таклиф этилгани ижобий баҳоланди. Улар мамлакатимиз саноат салоҳияти билан яқиндан танишиб, Ўзбекистон маҳсулотларини Яқин Шарқ бозорларига олиб чиқиш режалари борлигини билдирган.

 

Натижада жорий йилнинг ўзида Ироққа юзлаб миллион долларлик маҳсулотлар экспорт қилиш бўйича келишувларга эришилди.

 

Шунингдек, элчилар Ветнам, Баҳрайн ва Португалия билан ҳам шу модель асосида ишлаб, янги ҳамкорлар топиши ва бозорларга киришни жадаллаштириши лозимлиги таъкидланди.

 

Ўтган йили Европа давлатларига экспорт 23 фоизга ошиб, 2,3 миллиард долларга етди. Шу билан бирга, айрим мамлакатлардаги дипломатик ваколатхоналар томонидан ўзбек маҳсулотларини тарғиб қилиш борасида етарли натижага эришилмагани танқид қилинди.

 

Франция кимё саноати маҳсулотлари учун истиқболли бозор экани қайд этилиб, Фарғона, Навоий, Қашқадарё ва Тошкент вилоятларидаги кимё корхоналари учун янги экспорт имкониятлари мавжудлиги кўрсатиб ўтилди. Шу муносабат билан Франциядаги ваколатхонага минерал ўғитларга бўлган талаб ва стандартларни ишлаб чиқарувчиларга етказиш ҳамда кўргазмалар ташкил этиш топширилди.

 

Умуман, Европанинг қишлоқ хўжалиги ривожланган давлатларига минерал ўғит экспортини ошириш бўйича алоҳида дастур ишлаб чиқиш вазифаси белгиланди.