АҚШда Янги йил арафасида теракт содир этишни режалаштирган гуруҳ аъзолари ҳибсга олинди. Reuters хабарига кўра, АҚШ Адлия вазирлиги ва Федерал қидирув бюросининг ҳамкорликдаги тезкор тадбирлари натижасида Калифорния штатининг Лос-Анжелес шаҳрида Turtle Island Liberation Front номи билан танилган сўл радикал гуруҳнинг тўрт нафар аъзоси қўлга олинган.
Расмий маълумотларга кўра, гуруҳ аъзолари Янги йил байрами арафасида бир нечта портлашлар уюштиришни режалаштирган. Тергов жараёнида аниқланишича, улар сўл ва фаластинпараст қарашларга эга бўлган ҳамда зўравонлик ҳаракатларини амалга оширишга тайёргарлик кўрган.
АҚШ Адлия вазири Памела Бондининг таъкидлашича, гуруҳнинг эҳтимолий нишонлари орасида АҚШ Иммиграция ва божхона хизмати (ICE) агентлари ҳам бўлган. Расмийлар ҳолат юзасидан тергов давом этаётганини ва миллий хавфсизликни таъминлаш бўйича қўшимча чоралар кўрилаётганини билдирди.