Бухорода аёл ўзига шахсий мулк сифатида тегишли бўлган дўконни Когон шаҳар ҳокимлигига беғараз топширди. Шаҳар ҳокими 15 декабрь куни савдо дўконини ҳокимият балансига олиш бўйича қарорни чиқарган. Ҳокимнинг қарори фуқаро Х.Рашидованинг 6 декабрь куни ёзган аризасига кўра чиқарилгани айтилмоқда.
Маълумотларга кўра, мазкур савдо дўкони Когон шаҳар бош бекати ҳудудида жойлашган ва ҳажми 60 квадрат метрга тенг бўлган.
Шаҳар ҳокими ўринбосари, шаҳар ҳокимлиги бош ҳисобчиси ва “Когон уй-жойлар ва нотурар жойлардан фойдаланиш ва ҳисобга олиш” давлат унитар корхонаси раҳбарига ушбу дўконни нотариал идора билан биргаликда, белгиланган тартибда қабул қилиш ишларини амалга ошириш топшириғи берилган.
Аввалроқ Тошкент шаҳар ҳокимлигига фуқаро томонидан "MERCEDES BENZ" совға қилингани ҳақида хабар берилганди.
