Беларусь Тошкентга қандай трамвай етказиб бера олади?
Аввалроқ мамлакат Бош вазири Минск трамвай йўли лойиҳаларида иштирок этишга тайёрлигини айтганди.
Маълумки, 2023 йилдан бошлаб Тошкентда трамвай йўлларини қуриш ишлари бошланади. Айни кунларда Ўзбекистон Республикасида бўлиб турган Беларусь бош вазири Роман Головченко 25 апрель куни Абдулла Арипов билан учрашувда Минск трамвай билан боғлиқ лойиҳаларда иштирок этишга тайёрлигини маълум қилди.
Шу кунларда пойтахтимиўда ўтказилаётган “ИННОПРОМ. Марказий Осиё” II халқаро саноат кўргазмасида кўплаб Беларусь компаниялари ҳам иштирок этмоқда. Улар орасида автобус, трамвай ва троллейбуслар ишлаб чиқариш билан шуғулланадиган “Белкоммунмаш” – BKM Holding ҳам бор. Zamon.uz ушбу йирик ишлаб чиқариш бирлашмаси бош директори Олег Бийко билан суҳбат уюштирди.
BKM Holding, унинг экспорт географияси ва ҳамкорлари
— Фаолиятимизга салкам 50 йил бўлди. Ҳозирда “Белкоммунмаш” ишлаб чиқарган трамвайлардан Беларусдан ташқари, Қозоғистон ва Россияда ҳам фойдаланилади. Хусусан, Қозоғистоннинг Павлодар шаҳрида биз ишлаб чиқарган трамвайлар юради.
Маҳсулот ишлаб чиқаришда, асосан, Беларуснинг ўзида яратилган эҳтиёт қисмларидан фойдаланилади. Европа билан боғлиқ сўнгги воқеалар (санкциялар)нинг таъсири, албатта, сезилди. Шу сабабли, Ғарбдан сотиб оладиган компонентларни Хитойдан харид қиляпмиз. Аммо бу маҳсулот сифатига катта таъсир ўтказмайди.
Шу билан бирга, Европага ҳам экспортимиз бор. Масалан, ўтган йили Болгарияга троллейбус етказиб берганмиз. Бу йил Босния ва Герцеговинадан ҳам троллейбусларга буюртма тушган. Бундан ташқари, Буюк Британияда – BKM Holding ишлаб чиқарган электробуслардан фойдаланилади.
Трамвай нархи, унинг бошқа рақобатчи маҳсулотлардан афзаллиги трамвай нархи ўртача 350 минг евро. Агарда унга қўшимча қулайликлар (масалан, ёзда кондиционер) қўшиладиган бўлса, 500 минг еврогача боради.
Фикримча, бизнинг бошқа компанияларнинг шу турдаги маҳсулотлардан фарқи унинг арзонлигида бўлса керак. Масалан, асосий рақобатчиларимиздан бири бўлган Россия трамвайларидан биз ишлаб чиқарган машиналар анча арзон.
Кичик ҳажмли трамвай 28 ўриндиқли, умумий сиғими 165 кишига мўлжалланган.
Албатта, бизни Тошкентда трамвай йўналиши қайта очилиши мумкинлигидан хабаримиз бор. Агарда тендерда ғолиб бўлсак, энг сифатли маҳсулотларнт етказиб берамиз.
Муаллиф: Жаҳонгир ҚЎЗИЕВ
