Буюк Британияда Болгариянинг уч фуқароси Россия фойдаси учун жосуслик қилаётганликда гумонланиб ҳибсга олинди, деб ёзмоқда Британия оммавий ахборот воситалари.
Таъкидланишича, қўлга олинганлар февраль ойидан буён ҳибсда сақланмоқда. Улар устидан суд 2024 йил январь ойида Лондонда бошланади, дея хабар берди ЎзА.
“Буюк Британияда Россия фойдасига ишлаган уч жосус қўлга олинган, уларга миллий хавфсизлик масалалари бўйича олиб борилаётган йирик қидирув ишлари доирасида айб қўйилган”, – дейилади Би-би-Си телерадио корпорацияси тарқатган хабарда.
Хабарда таъкидланишича, қўлга олинганлар Болгария фуқароси ҳисобланади, лекин кўп йиллардан буён Буюк Британияда истиқомат қилган.
Ҳукуматнинг таъкидлашича, болгарияликлар Россия махсус хизматига ишлаб келган. Улар қалбаки ҳужжатларни сақлаганликда айбланмоқда, дейилади оммавий ахборот воситалари тарқатган хабарларда. Тарқатилган маълумотларга кўра, гап Британия, Болгария, Италия, Испания ва бошқа давлатларнинг шахсни тасдиқловчи ҳужжатлари ҳақида бормоқда.