Чехия Республикасининг янги сайланган Президенти Петр Павел ва Словакия Президенти Зузана Чапутова Украинага ташриф буюриш ниятида.
«Корреспондент» нашрининг ёзишича, Павел 29 январь куни Украина Президенти Владимир Зеленскийга қўнғироқ қилиб, Чапутова билан биргаликда ташриф буюриш таклифи билан чиққан.
Словакия раҳбари ҳам бу имкониятни ижобий баҳолаган. Ташрифнинг аниқ санаси ҳозирча номаълум.
Президентликка янги сайланган Петр Павел Чехия Европа Иттифоқи ва НАТО билан стратегик муносабатларини сақлаб қолишини ҳамда Украина томонида бўлишини айтган. Шунингдек, у Украинадаги уруш Чехияга ҳам тегишли уруш эканлигини, чунки бу халқаро муносабатлар келажаги, хавфсиз Европа келажаги учун муҳим эканини таъкидлаган.
Эслатиб ўтамиз, Украина президенти Владимир Зеленский Чехия Республикасининг янги Президенти Петр Павелни сайловлардаги ишончли ғалабаси билан табриклаб, ҳамкорлик давом этишига умид билдирганди.