ДХХ адвокатларни пора билан қўлга туширди

Самарқанд, Фарғона ва Тошкент шаҳарларида пора олган адвокатлар қўлга тушди. Бу ҳақида Давлат хавфсизлик хизмати хабар бермоқда.

 

Қайд этилишича, Фарғона шаҳридаги адвокатлик фирмаларида ишловчи 2 нафар адвокат 6 йил 8 ой муддатга озодликдан маҳрум қилинган ва ҳозирда жазо муддатини ўтаётган маҳкум жазосини суд органларидаги танишлари орқали озодликдан маҳрум қилиш билан боғлиқ бўлмаган бошқа жазога ўзгартириб бериш эвазига 50 минг доллар олган вақтларида ушланган.

 

Шунингдек, Тошкент шаҳридаги адвокатлик фирмасининг муқаддам бир неча маротаба судланган адвокати тўқимачилик маҳсулотлари ишлаб чиқаришга ихтисослашган МЧЖнинг мансабдор шахсларига нисбатан Жиноят Кодексининг 167-моддаси 3-қисми «а» банди билан қўзғатилган жиноят иши доирасида аниқланган 12 млрд сўм миқдоридаги зарарнинг 6 млрд сўмини прокуратура ва ички ишлар органларидаги танишлари ёрдамида жабрланувчи фойдасига ундириб бериш эвазига 100 минг доллар талаб қилган. Аммо у сўралган пул маблағидан 50 минг долларини олган вақтида қўлга олинган.

 

Тезкор тадбир давом эттирилиб, адвокатнинг ушбу ишга алоқадор бўлган ҳамкасби ва муқаддам прокуратура органларида ишлаган таниши ҳам 50 минг доллардан 30 минг долларини олган вақтларида ушланган.

 

Бундан ташқари, Самарқанд шаҳридаги адвокатлик фирмасининг аввал судланган адвокати Оқдарё туманида яшовчи фуқаронинг турмуш ўртоғи билан қонуний никоҳини бекор қилишда суд тизимидаги танишлари орқали ёрдам бериш эвазига 5 минг доллар олган вақтида қўлга тушган.

 

Ҳозирда мазкур шахсларга нисбатан Жиноят Кодексининг тегишли моддалари билан жиноят ишлари қўзғатилган.