Филиппиннинг марказий ҳудудида 6,9 магнитудали зилзила юз берди. Дастлабки маълумотларга кўра, табиий офат камида 69 кишининг ҳаётига зомин бўлди, 150 дан ортиқ фуқаро тан жароҳати олди. Бу ҳақда Reuters агентлиги қутқарув хизматларига таяниб хабар берди.
АҚШ Геология хизмати (USGS) берган маълумотга кўра, ер силкиниши 30 сентябр куни маҳаллий вақт билан соат 22:00 атрофида юз берган. Эпицентр Себу провинцияси соҳилларида қайд этилган.
Филиппин фуқаролик мудофаа бошқармаси ўлим ҳолатларини тасдиқлади. Қутқарувчилар маълумотига кўра, Бого шаҳрида 30 киши ҳалок бўлган. Сан-Ремижио шаҳрида эса спорт мажмуаси қулаши оқибатида камида 13 киши вафот этган, улар орасида соҳил қўриқлаш хизмати вакиллари ва бир ўт ўчирувчи ҳам борлиги маълум қилинди.
Маҳаллий шифохоналар жабрланганлар оқими сабаб тўлиб кетган. Ҳудудда электр таъминоти қисман узилган, кўприклар ва биноларда жиддий шикастланишлар кузатилган. Себу провинцияси ҳукумати фавқулодда ҳолат эълон қилиб, вайроналар остида қолганларни қутқариш ва аҳолини зарур ёрдам билан таъминлаш ишларини олиб бормоқда.