Финляндия президенти Александр Стубб 30–31 октябрь кунлари Ўзбекистонга расмий ташриф билан келади. Бу ҳақда Финляндия президентининг матбуот хизмати маълум қилди.
Ташриф доирасида 31 октябрь куни президент Стубб Тошкент шаҳрида Ўзбекистон Республикаси президенти Шавкат Мирзиёев билан музокаралар олиб боради. Учрашув чоғида икки давлат ўртасидаги ҳамкорликни янада кенгайтириш, Европа ва Марказий Осиёда кечаётган геосиёсий жараёнлар, шунингдек, Россия ва Украина ўртасидаги уруш билан боғлиқ вазият муҳокама қилинади.
Шунингдек, томонлар халқаро ҳамкорликни мустахкамлаш, савдо-иқтисодий, сармоя, таълим ва инновациялар соҳасида янги лойиҳаларни амалга ошириш масалаларига алоҳида эътибор қаратади.
Президент Стубб ташриф давомида бизнес-семинарда қатнашади, Жаҳон иқтисодиёти ва дипломатия университетида маъруза ўқийди ҳамда Ўзбекистоннинг етакчи сиёсатшунослари ва иқтисодий экспертлари билан учрашади.
Финляндия делегацияси таркибида парламент депутати, Ўзбекистон билан дўстлик гуруҳи раҳбари Вилле Скиннари ҳамда бир қатор йирик фин компаниялари вакиллари иштирок этади. Уларнинг ташрифи икки мамлакат ўртасидаги иқтисодий алоқаларни мустахкамлашга хизмат қилиши кутилмоқда.
Маълумот ўрнида, Финляндия президенти Ўзбекистонга сўнгги марта 1992 йилда Мауно Койвисто даврида ташриф буюрган эди. 30 йилдан ортиқ танаффусдан сўнг амалга оширилаётган бу ташриф икки томонлама муносабатларда янги саҳифа очиши, сиёсий ва иқтисодий ҳамкорликни янги босқичга олиб чиқиши кутилмоқда.