“Мадуронинг саноқли кунлари қолди” — Рик Скотт
АҚШ сенатори Венесуэлада ички ёки ташқи омиллар сабаб муҳим ўзгаришлар кутилаётганини билдирди.
АҚШ Сенатининг республикачи аъзоси Рик Скотт Венесуэла президенти Николас Мадурони имкони борича тезроқ мамлакатни тарк этиб, Россия ёки Хитойдан бошпана излашга чақирди.
Бу ҳақда у Fox News телеканалига берган интервюсида маълум қилган. Сенаторнинг сўзларига кўра, “Мадуронинг кунлари саноқли” бўлиб, Венесуэлада ёки халқаро миқёсда муҳим ўзгаришлар содир бўлиши мумкин.
“Агар Мадуронинг ўрнида бўлганимда, ҳозир Россия ёки Хитойга йўл олардим. Унинг ҳокимиятдаги кунлари тугаб бормоқда”, — деди Скотт.
У, шунингдек, Венесуэла халқи сўнгги президентлик сайловида Мадурога қарши овоз берганини, бироқ сайлов натижалари сохталаштирилганини таъкидлади. Сенатор Мадурони “диктатор” ва “наркокартел раҳбари” деб атади.
Рик Скоттнинг фикрича, мамлакат ичида ёки ташқарисида рўй берадиган сиёсий воқеалар Венесуэлада янги босқични бошлаб бериши мумкин.
