Москва марказида содир бўлган автомобиль портлаши оқибатида Россия Қуролли кучларининг юқори мартабали офицерларидан бири — генерал Фанил Сарваров ҳалок бўлди. Ҳодиса 22 декабрь куни тонгда, генерал хизмат машинасида ҳаракатланаётган пайтда юз берган.
Дастлабки маълумотларга кўра, портловчи мослама генерал ҳаракатланган “KIA Sorento” автомобилига олдиндан ўрнатилган бўлган. Кучли портлаш оқибатида машина жиддий зарар кўрган, Сарваров эса оғир аҳволда шифохонага етказилган. Бироқ шифокорларнинг саъй-ҳаракатларига қарамай, у ҳаётдан кўз юмган.
Манбаларга кўра, Фанил Сарваров Россия Мудофаа вазирлиги тизимида муҳим лавозимда фаолият юритиб, ҳарбий тайёргарлик ва оператив машғулотлар учун масъул бўлган. У Россия президенти Владимир Путинга яқин ҳарбий кадр сифатида танилган ва армияда таъсирли шахс ҳисобланган.
Ҳодиса юзасидан Москва прокуратураси томонидан жиноий иш қўзғатилди ва тергов марказий идоралар назоратига олинди. Расмийлар ҳозирча портлаш сабаблари ва эҳтимолий ижрочилар ҳақида изоҳ бермаган. Тергов натижалари яқин кунларда маълум қилиниши кутилмоқда.