Навоий вилояти Ички ишлар бошқармасида Ички ишлар вазири ўринбосари раҳбарлигида танқидий-таҳлилий йиғилиш бўлиб ўтди. Унда вилоят ИИБнинг барча шахсий таркиби иштирок этди. Бу ҳақда Навоий вилояти ИИБ Ахборот хизмати хабар берди.
Йиғилишда хизмат интизоми ва қонунчиликни мустаҳкамлаш, ходимлар томонидан турли кўринишдаги салбий ҳолатлар содир этилишининг олдини олиш, хусусан коррупцион турдаги жиноятларга сабаб бўлувчи омилларни ўз вақтида аниқлаш ва бартараф этиш масалалари атрофлича муҳокама қилинди.
Шунингдек, барча раҳбарларга кундалик назорат жараёнида қўл остидаги шахсий таркибга индивидуал ёндашиш, ходимларнинг хизмат фаолияти, ижтимоий- оилавий аҳволи ҳамда руҳий-психологик ҳолатини инобатга олган ҳолда вазифа ва топшириқлар бериш зарурлиги қатъий таъкидланди. Ҳар бир раҳбар ўз қўл остидаги ходимлар фаолияти учун шахсан масъул экани қайд этилди.
Йиғилиш давомида жорий йилнинг 10 ойи мобайнида ички ишлар органлари ходимлари томонидан 93 та турли салбий ҳолат содир этилгани, шундан 10 нафар ходим ички ишлар органлари сафидан четлаштирилгани маълум қилинди. Шунингдек, аниқланган салбий хатти-ҳаракатлар юзасидан яна 13 нафар ходимга нисбатан хизмат текширувлари тайинланди.
Бундан ташқари, ички ишлар органларини халқчил ва профессионал тузилма сифатида янада ривожлантириш, ходимларнинг жанговар ва жисмоний тайёргарлигини, шунингдек билим даражасини оширишга қаратилган қатор чора-тадбирлар белгилаб олинди.