Немис автомобилсозлиги Осиёлик рақобатчилардан ортда қолмоқда

2025 йилнинг биринчи чорагида дунё автомобиль бозорида содир бўлган ўзгаришлар немис автомобилсозлигини оғир вазиятга қўйди. Консалтинг компанияси EY (Ernst & Young) томонидан олиб борилган тадқиқотга кўра, дунёнинг энг даромадли олти автомобиль ишлаб чиқарувчисидан бештаси Осиёга тегишли, немис бренди BMW эса учинчи ўринни сақлаб қолган ягона Европа вакили бўлиб қолди.

 

Тадқиқотда дунёнинг етакчи 20 автомобиль концерни молиявий кўрсаткичлари таҳлил қилинган. Унга кўра, Германиянинг уч йирик компанияси — Volkswagen, BMW ва Mercedes-Benz — умумий савдо ҳажмини 2,3 фоизга йўқотган. Шулардан фақат Волксваген бироз ўсишга эришган бўлса, BMW ва Mercedes'да сезиларли даражадаги пасайиш кузатилган. Умумий фойда эса ҳар учала компания учун ўртача учдан бирга қисқарган.

 

Худди шундай салбий тенденциялар АҚШ автомобилсозлигида ҳам кузатилган: савдо 2,9 фоизга пасайган, фойда эса деярли учдан бирга камайган.

 

Аммо Осиё бозори бутунлай бошқача манзара намойиш қилмоқда. Хитой автомобилсозлиги 2025 йилнинг биринчи чорагида савдоларни қарийб 15 фоизга, фойдани эса 66 фоизга оширишга муваффақ бўлган. Бу борада энг яхши натижаларни BYD ва Geely компаниялари кўрсатган. Эслатиб ўтамиз, Geely ҳозирда швед бренди Volvo ҳамда машҳур London таксилари ишлаб чиқарувчиси Тҳе Лондон Тахи компаниясига эгалик қилади.

 

Япония ва Жанубий Корея ишлаб чиқарувчилари ҳам мусбат натижалар қайд этган — бу эса Осиё автомобилсозлигининг глобал бозорда тобора кучайиб бораётганини тасдиқлайди.

 

Тадқиқот муаллифлари огоҳлантиради: “Агар фойда даражаси яна пасайишда давом этса, айрим йирик ишлаб чиқарувчилар ҳаёт-мамот масаласига дуч келиши мумкин, чунки автомобилсозликдаги рақобат ниҳоятда кескин.”

 

Бу ҳолат Германия автомобиль саноатини тубдан ўзгаришлар қилишга ундаши мумкин. Бозорда омон қолиш учун немис концернлари инновациялар, электромобиллар ва Осиёдаги рақобатчиларга қарши рақобатбардош стратегиялар ишлаб чиқиши зарур бўлади.