Ўзбек анимацияси янги босқичда: илк 3D тўлиқ метражли фильм экранларда
Фильмининг катта премьераси 25 декабрь куни Ўзбекистон бўйлаб барча кинотеатрларда бўлиб ўтади.
Ўзбекистон анимация саноатида муҳим тарихий воқеа юз берди. Мамлакатимизда илк бор тўлиқ метражли 3D форматда яратилган “Сеҳрландия: қаҳрамонлик миссияси” анимацион фильми катта экранларга чиқмоқда. Ушбу лойиҳа ўзбек анимациясининг технологик ва ижодий салоҳиятини янги даражага олиб чиқди.
Фильм нафақат маҳаллий томошабинлар, балки хорижий мутахассислар эътиборини ҳам тортди. Яқинда Туркиянинг нуфузли “ТРТ Аваз” телеканали мазкур анимацион асар ҳақида махсус репортаж тайёрлаб, график сифати, сюжет ёндашуви ва чуқур ғоявий мазмунини юқори баҳолади. Бу ҳолат ўзбек киносининг халқаро майдондаги нуфузи ошиб бораётганидан далолат беради.
“Сеҳрландия: қаҳрамонлик миссияси” фильмининг катта премьераси 25 декабрь куни Ўзбекистон бўйлаб барча кинотеатрларда бўлиб ўтади. Фильм болалар ва катталар учун бирдек қизиқарли бўлиб, томошабинларга унутилмас таассурот ва байрамона кайфият улашиши кутилмоқда.
