Ўзбекистон аҳолиси 38,2 миллиондан ошди
Мамлакат аҳолиси бир йилда 693,5 минг кишига кўпайди.
Миллий статистика қўмитаси маълумотларига кўра, 2026 йил 1 январь ҳолатига Ўзбекистон Республикасининг доимий аҳолиси сони 38 миллион 236 минг 704 кишини ташкил этди.
Мазкур кўрсаткич ўтган йилнинг мос даврига нисбатан 693,5 минг кишига ёки 1,8 фоизга ошган.
Ҳудудлар кесимида доимий аҳоли сони энг кўп Самарқанд вилоятида қайд этилиб, 4 миллион 379,8 минг кишини ташкил қилган. Ундан кейинги ўринларда Фарғона вилояти (4 миллион 223,0 минг), Қашқадарё вилояти (3 миллион 717,0 минг), Андижон вилояти (3 миллион 521,8 минг) ва Наманган вилояти (3 миллион 190,8 минг) жой олган.
Тошкент шаҳрида доимий аҳоли сони 3 миллион 178,1 минг кишига етган бўлса, Тошкент вилоятида бу кўрсаткич 3 миллион 160,7 минг кишини ташкил этган.
Энг кам аҳоли сони Сирдарё вилоятида қайд этилиб, 946,3 минг нафарни ташкил қилган.
