Президент фармони асосида наркотик воситаларнинг ноқонуний муомаласи ҳақида хабар берган ёки аниқлашга кўмаклашган фуқаролар муносиб рағбатлантирилиши белгиланди. Бунинг тартибини Наркотиклар ва ўқотар қуролларни назорат қилиш агентлиги ишлаб чиқиб, Вазирлар Маҳкамасига киритади — дея хабар беради ҳукумат қарор лойиҳаси.
Ички ишлар вазирлиги 2025 йил якунигача маҳаллаларда хизмат қилувчи профилактика инспекторларини ноқонуний нарколабораториялар ва қўлбола қадоқлаш цехларини аниқлаш бўйича ўқитишни ташкил этади. Шу билан бирга, самарали фаолият кўрсатган ходимларни бюджетдан ташқари маблағлар орқали рағбатлантириш ёки маҳаллада аниқланган тақдирда бошқа идоралар томонидан интизомий чора қўллаш тартиби жорий этилади.
Ҳужжатда 2026 йил 1 мартга қадар ички ишлар органлари учун гиёҳвандлик воситаларини экспресс аниқлашга мўлжалланган замонавий техник воситалар харид қилиниши ва амалиётга жорий этилиши назарда тутилган. Бундан ташқари, психотроп ва кучли таъсир қилувчи моддалар айланмасига қарши чора-тадбирлар кучайтирилади, жазолар оғирлаштирилади ва ёшлар иштирокидаги жиноятлар учун алоҳида қатъий чора белгиланиши кўзда тутилган.