Ўзбекистонда қишлоқ хўжалиги ерларида сувдан фойдаланишни назорат қилиш учун дронлардан фойдаланилади

 

Ўзбекистонда қишлоқ хўжалиги ерларида сув ресурсларидан фойдаланиш самарадорлигини ошириш ва сув исрофини камайтириш мақсадида назорат механизмлари кучайтирилмоқда. Президент матбуот хизмати хабарига кўра, Сув хўжалиги объектлари хавфсизлиги ва сувдан фойдаланишни назорат қилиш инспекциясига экин майдонларида сувдан фойдаланиш жараёнини мониторинг қилиш учун учувчисиз учиш аппаратларидан (дронлардан) фойдаланишга рухсат берилади.

 

Қайд этилишича, инспекциянинг ҳудудий бўлинмаларида сув тежовчи технологияларни жорий этиш ҳамда сувдан фойдаланишни мониторинг қилишга масъул бўлимлар ташкил этилади. Шунингдек, тадбиркорлик субъектларида ўтказиладиган текширувлар жараёнида ёнкамералардан фойдаланиш амалиёти йўлга қўйилади.

 

Сув тежовчи технологиялардан мақсадли фойдаланиш устидан назорат кучайтирилади. Хусусан, субсидия ажратилган ва сув тежовчи технологиялар жорий этилган ер майдонларида ушбу ускуналар ёки уларнинг асосий қисмларидан фойдаланмасдан анъанавий суғориш усулларини қўллаш сувдан ўзбошимчалик билан фойдаланиш сифатида баҳоланади.

 

Бундан ташқари, шоли етиштириладиган ҳамда балиқчилик хўжаликлари жойлашган ҳудудларда сувни бошқариш ва ҳисобини юритишни такомиллаштириш мақсадида «ақлли» сув ўлчаш ва ҳисоблаш қурилмалари ўрнатилади. Ушбу воситалар “Сув ҳисоби” ахборот тизимига интеграция қилинади.

 

Фермер хўжаликларининг ҳуқуқ ва манфаатларини ҳимоя қилишни кучайтириш мақсадида «Сувхўжаликназорат» инспекцияси ва унинг ҳудудий бошқармалари томонидан сув тежовчи технологияларни ўрнатиш билан боғлиқ масалалар юзасидан судларга даъво аризалари киритилганда давлат божи ундирилмаслиги таклиф этилди.

 

Шунингдек, илғор хорижий тажрибани инобатга олган ҳолда сув тежовчи технологияларни жорий этиш бўйича мутахассислар тайёрлаш ва уларнинг малакасини ошириш режалари тақдим этилди. Жумладан, “Сувчилар мактаби” лойиҳаси доирасида жорий йилда 10 минг нафар фермер хўжалиги ходимининг малакаси оширилади, 358 нафар сув хўжалиги мутахассиси хорижда малака оширади.

 

Бундан ташқари, сув тежовчи технологияларни банк кредитларисиз, ўз маблағлари ҳисобидан жорий этаётган ташаббускорларни қўллаб-қувватлаш мақсадида субсидия ажратишнинг янги тизими йўлга қўйилади. Ушбу тизимга кўра, лойиҳа-смета ҳужжатлари ва таъминотчи корхона билан тузилган шартнома асосида субсидия маблағларининг 50 фоизи Аграр соҳада тўловлар агентлиги томонидан олдиндан ажратилади.