Ўзбекистонда сентябрь-ноябрь ойларида кутилаётган об-ҳаво маълумотлари эълон қилинди

 

«Ўзгидромет» 2023 йилнинг сентябрь-ноябрь ойларида кутилаётган об-ҳаво маълумотлари прогнозини эълон қилди.

 

Унга кўра, сентябрь ойида ўртача ойлик ҳаво ҳарорати республика бўйича меъёр атрофида, баъзи жойларда меъёрдан 1-1,5 даражага юқори бўлиб, 18-25 даражани ташкил этади. Ойнинг биринчи ярмида ҳарорат асосан кечалари 13-18 даража, кундуз кунлари 33-38 даража бўлади. Ойнинг иккинчи ярмида ҳарорат кечалари 13-18 даражадан 8-13 даражагача, кундуз кунлари 30-35 даражадан 23-28 даражагача ўзгариб туради.

 

 

Ушбу ойда ойлик ёғингарчилик миқдори меъёрдан кам, баъзи жойларда одатий меъёр атрофида бўлиши кутилмоқда. Сентябрь ойининг иккинчи ва учинчи ўн кунлигининг айрим кунларида бироз ёмғир ёғиши мумкин, жанубда эса ёмғир ёғиш эҳтимоли кам.

 

Октябрь ойида ўртача ойлик ҳаво ҳарорати республика бўйича меъёр атрофида бўлиб, 10-12 даражани, жанубда 16-18 даражани ташкил этади. Ой давомида ҳарорат кечалари 10-15 даража илиқдан 3-8 даражагача ўзгариб туради, ой охирида 0-2 даражагача совуқ бўлиши мумкин, кундуз кунлари 23-28 даража илиқдан 13-18 даражагача ўзгариб туради.

 

 

Шимолий ҳудудларда, ой давомида ҳаво ҳарорати кечалари 8-13 даража илиқдан 1-6 даражагача ўзгариб туради. Шунингдек, баъзи кунлари ҳарорат 0-3 даражагача совуқ бўлиши мумкин, кундуз кунлари 12-17 даража илиқдан 20-25 даражагача ўзгариб туради.

 

Ойлик ёғингарчилик миқдори меъёр атрофида, баъзи жойларда меъёрдан кўп, шимолда ва жанубда баъзи жойларда меъёрдан кам бўлиши кутилмоқда. Ойнинг иккинчи ва учинчи ўн кунликларида асосан ёмғир кўринишидаги ёғингарчилик бўлиши кутилмоқда.

 

Ноябрь ойида ўртача ойлик ҳаво ҳарорати ўртача кўп йиллик қийматларга яқин бўлиб, 2-8 даража илиқни, жанубда эса 10 даражагача илиқ бўлади.

 

 

Ушбу ойда Ўзбекистон ҳудудининг катта қисмида ёғингарчилик меъёрга яқин бўлиши прогноз қилинмоқда, фақат республиканинг жануби-ғарбида бироз эҳтимоллик билан ёғингарчилик тақчиллиги бўлиши кутилмоқда.