Ўзбекистондаги барча вазирлик ва идораларда танлов асосида энг кўп китоб ўқиган ходимга бир ойлик иш ҳақи миқдорида пул мукофоти берилади. Бу “Китобхонлик маданиятини ривожлантириш ва аҳоли ўртасида китоб ўқишга қизиқишни ошириш чора-тадбирлари тўғрисида”ги Президент қарорида белгиланди.
Қарорга мувофиқ, 2026 йил 1 апрелга қадар барча вазирлик ва идоралар ҳамда уларнинг тизимидаги ташкилотларда “Китоб бурчаги” ташкил этилади. Шунингдек, ходимлар учун ҳар ойда “Китоб ўқиш соати” жорий қилинади ҳамда китобхонлик бўйича ички рейтинг тизими йўлга қўйилади.
2026 йил 1 мартга қадар вазирлик ва идораларда тегишли соҳалар бўйича касбий фаолиятга оид тавсия этиладиган адабиётлар рўйхати шакллантирилади. Ҳар йили камида учта хорижий касбий адабиёт маҳаллий нашриётлар орқали ўзбек тилига таржима қилиниб, малакали мутахассислар иштирокида изоҳлар, луғатлар ва мисоллар билан бойитилади.
Қарорда ёшлар ва таълим олувчиларни рағбатлантириш чоралари ҳам белгиланган. Жумладан, энг кўп китоб ўқиган топ-100 таликка кирган ўқувчи ва талабаларнинг ҳар бирига БҲМнинг 25 баравари, яъни 10,3 миллион сўм миқдорида пул мукофоти берилади.
Шунингдек, Президент қарорига асосан Ёшлар ишлари агентлиги ҳузурида Китобхонлик маданиятини ривожлантириш жамғармаси ташкил этилади. Умумтаълим мактабларида “Жадидлар изидан” китобхонлик клублари фаолияти йўлга қўйилади.
Мазкур қарорнинг асосий мақсади 2026–2030 йилларда аҳолининг китобхонлик даражасини ошириш, яъни бир киши томонидан ўқиладиган китоблар сонини йилига ўртача 10 тага етказиш этиб белгиланди.
Жамғарма маблағлари ёш ёзувчиларни қўллаб-қувватлаш, болалар адабиётини ривожлантириш, хорижий ва миллий адабиётларни таржима қилиш, шунингдек, истеъдодли муаллифларга моддий рағбат бериш каби йўналишларга йўналтирилади.