Путин билан Байденнинг Женевадаги учрашувига 10 миллион доллардан зиёд харажат қилинган
Швейцариянинг Женева кантони Россия ва АҚШ Президентлари Владимир Путин ва Жо Байден учрашувини ўтказиш учун сарфланган харажатларни ҳисоблашни якунламоқда: умумий миқдор 10 миллион доллардан ошиши мумкин. Бу ҳақда “РИА Новости” хабар берди.
"Россия-АҚШ саммити учун кантон харажатларининг якуний ҳисоб-китоби якунланмоқда ва тез орада Женева кантони бу масалада яқиндан ҳамкорлик қилаётган федерал органларга юборилади", дейилади хабарда.
Женева Давлат Кенгаши Социалистик партиянинг шошилинч сўровига жавобан саммитга сарфланган маблағ ҳақидаги дастлабки маълумотларни эълон қилган.
Оммавий ахборот воситаларида эълон қилинган дастлабки ҳисоб-китобларга кўра, саммит давомида хавфсизликни амалга ошириш 5,176 миллион франкга тушган. Бу кантон полицияси, қўшни кантонлардан хавфсизлик хизматлари, уларнинг турар жойли ва транспортлари, ҳарбий ва фуқаро муҳофазаси хизматларининг иштирокини таъминлашга сарфланган. Бу харажатларнинг бир қисми федерал полиция томонидан қопланади.
Яна 222 658 франк протокол хизматларига сарфланди, 518 минг франк эса саммитнинг хавфсизлик периметрида жойлашган турли ташкилотларнинг бир кунлик ишламай қолиши учун компенсация қилинган. Бу ерда федерал ҳукумат ҳам харажатларнинг бир қисмини ўз зиммасига олади.
Ташқи ишлар федерал департаменти (ТИВ) саммитни ёритган журналистларни ташиш ва овқатланиши учун сарфланган 3 миллион франкни ўз зиммасига олади.
Буларнинг барчаси дастлабки ҳисоб-китоблар, якуний маълумотлар 10-15 фоизга ошиши мумкин. Ҳисоб-китоб тугагач сентябрь ойининг охирида федерал органларга юборилади.
Насиба Тўхтаева
