Эрон Ҳўрмуз бўғозида ҳаракатланиш учун айрим давлатлар кемаларига чекланган рухсат берди

Эрон ҳукумати Ҳўрмуз бўғози орқали айрим нефть танкерларининг ҳаракатланишига рухсат беришини маълум қилди. Бу ҳақда TRT World хабар берди.

 

Эрон ташқи ишлар вазири Аббос Ароқчи 16 март куни бўғоз “фақат душманлар ва уларнинг тажовузкорлигини қўллаб-қувватловчилар” учун ёпиқ бўлиб қолишини таъкидлади. Унинг сўзларига кўра, бошқа давлатларга тегишли кемалар учун айрим истиснолар қўлланмоқда.

 

Эрон ТИВ расмий вакили Исмоил Бақоий ҳам бу маълумотни тасдиқлаб, урушга алоқадор бўлмаган мамлакатлар кемалари махсус рухсатнома ва ҳарбийлар билан мувофиқлаштириш асосида бўғоздан ўтишига ижозат берилаётганини билдирди.

 

Мазкур баёнотлар АҚШ ва Исроил билан кескинлашган ҳарбий қарама-қаршилик фонида янграмоқда. Сўнгги ҳафталарда зарбалар алмашинуви сабаб Ҳормуз бўғозида кемалар ҳаракати деярли тўхтаб, глобал энергия таъминотига хавф туғилгани қайд этилмоқда. Мутахассислар таъкидлашича, жаҳон нефть савдоси ва суюлтирилган газ ташувларининг қарийб 20 фоизи айнан шу ҳудуд орқали амалга оширилади.

 

Шу билан бирга, Теҳрон айрим давлатлар учун истиснолар жорий этган. Хусусан, 14 март куни Ҳиндистон байроғи остидаги иккита LPG танкери бўғоздан ўтган. Эроннинг Ҳиндистондаги элчиси Муҳаммад Фатҳалий бу ҳолатни глобал блокада шароитидаги истисно сифатида баҳолаган.

 

Bloomberg маълумотига кўра, Покистон миллий юк ташиш компаниясига тегишли танкер ҳам 15 март куни ҳудудни тарк этган. Шунингдек, Туркия транспорт ва инфратузилма вазири Абдулкадир Уралоғлу Эрон рухсатидан сўнг турк кемасининг бўғоздан ўтганини тасдиқлаган. Теҳрон Бангладеш кемалари учун ҳам олдиндан огоҳлантириш асосида ўтишга имкон берилиши мумкинлигини билдирган.

 

Чекланган рухсатларга қарамай, глобал нефть бозори босим остида қолмоқда. 16 март кунги савдоларда Brent маркали нефть нархи бир баррель учун 104 доллардан юқори даражада сақланиб турибди. 28 февралдан буён нархлар қарийб 45 фоизга ошган бўлиб, айрим даврларда 120 долларгача етган.

 

Экспертлар огоҳлантиришича, Ҳўрмуз бўғозидаги узоқ муддатли узилишлар глобал энергия таъминотини янада қисқартириши ва ёнилғи нархларининг ошишига олиб келиши мумкин.