“Миллий тикланиш” демократик партияси етакчиси Алишер Қодиров болаларнинг ўз она тилида таълим олмаслиги масаласини танқид қилиб, бу ҳолат таълим сифати ва боланинг устун манфаатларига салбий таъсир кўрсатаётганини таъкидлади.
Унинг сўзларига кўра, таълим олиш дегани — бола тушунадиган тилда билим олиш деганидир. Айни пайтда эса кўплаб болалар билмаган тилда таълим олаётгани уларнинг манфаатларига зид келмоқда. Қодиров бу танлов амалдаги қонунчилик асосида ота-оналарга берилганини, бироқ натижада болаларнинг ҳуқуқлари бузилаётганини қайд этди.
Партия етакчисининг айтишича, таълим тўғрисидаги қонунда боланинг устун манфаати етарлича инобатга олинмаган. Хусусан, у таълим тилини танлаш ҳуқуқи боланинг ўзига тегишли бўлиши керак, деган таклифни илгари сурди. Унинг фикрича, ҳозирда ота-оналар бу танловни амалга оширмоқда ва бу айрим ҳолларда болаларга жиддий зарар етказмоқда.
Қодиров партия вакиллари томонидан Тошкент шаҳри ва вилоятлардаги мактабларда олиб борилган таҳлилларга таянган ҳолда, кўплаб ўзбек болалар 1-синфдан бошлаб рус синфларида ўқиётганини маълум қилди. Натижада, айрим ўқувчилар 6-синфга келиб ҳам на математика, на физиканинг бошланғич фундаментал билимларини етарли даражада ўзлаштира олмаётгани кузатилган.
Унинг таъкидлашича, бундай ўқувчилар таълим жараёнида асосан тилни тушунишга уриниб, фан мазмунини ўзлаштиришдан четда қолмоқда. Бу ҳолат юқори синфларда билим бўшлиқларига, олий таълимга кириш имтиҳонларида эса паст натижаларга олиб келмоқда.