Фарғона вилояти суди матбуот хизмати хабар беришича, Жиноят ишлари бўйича Қўқон шаҳар судининг 2025 йил 17 декабрдаги қарори билан халқ табобати билан шуғулланиб келган фуқаро Иқбол Солиев (1971 йилда Фарғона вилоятида туғилган) Маъмурий жавобгарлик тўғрисидаги кодексининг 59-5-моддаси 3-қисмида назарда тутилган ҳуқуқбузарликни содир этган деб топилди.
Суд томонидан аниқланишича, фуқаро амалдаги қонунчилик талабларига зид равишда халқ табобати фаолиятини амалга оширган. Мазкур ҳолат юзасидан суд қарори билан унга нисбатан 10 сутка маъмурий қамоқ жазоси тайинланди.
Шунингдек, биринчи инстанция суди қарори устидан тарафлар қонунда белгиланган тартиб ва муддатларда Фарғона вилоят судининг жиноят ишлари бўйича судлов ҳайъатига апелляция ёки кассация тартибида шикоят бериш ҳамда протест келтириш ҳуқуқига эгалиги маълум қилинди.
Маълумот ўрнида қайд этилишича, фуқаро Иқбол Солиев аввал ҳам, хусусан, 2025 йил 10 январь куни Жиноят ишлари бўйича Қўқон шаҳар судининг қарорига мувофиқ Маъмурий жавобгарлик тўғрисидаги кодексининг 59-5-моддаси 1-қисмида назарда тутилган ҳуқуқбузарликни содир этган деб топилиб, унга базавий ҳисоблаш миқдорининг 20 баравари миқдорида маъмурий жарима жазоси қўлланилган.