Қозоғистон президентининг собиқ маслаҳатчиси, давлат арбоби Ержан Бабақумаров Остонада калтаклаб ўлдирилди. 56 ёшли собиқ амалдор бугун тунда вафот этди.
Полиция маълумотларига кўра, воқеа аввалроқ учрашган эркаклар ўртасида келиб чиққан жанжал натижасида содир бўлган. Бабақумаров олган жароҳатлар туфайли вафот этган.
Ички ишлар вазирлиги гумонланувчини қўлга олиб, вақтинчалик сақлаш изоляторига жойлаштирганлигини маълум қилди. Қотиллик юзасидан жиноят иши қўзғатилиб, судгача тергов ҳаракатлари олиб борилмоқда.
Ержан Бабақумаров 1969 йил 2 мартда Қозоғистоннинг Талдиқўрғон вилоятида туғилган, сиёсий фанлар номзоди. У 1996 йилдан буён Ички сиёсат бўлими бошлиғининг ўринбосари, Президент Администрацияси ахборот-таҳлил маркази раҳбари, Маданият ва ахборотлаштириш вазирининг масъул котиби, Бош вазир девони раҳбари ўринбосари, Президент ҳузуридаги Марказий коммуникациялар хизмати директори, Давлат раҳбари маслаҳатчиси – Президент Администрацияси Таҳлил ва прогнозлаш маркази раҳбари, 2019-2022 йилларда Олмаота ҳокими ўринбосари каби турли давлат лавозимларида ишлаган.