Кремл Петер Мадярни ғалаба билан табриклашдан бош тортди
Россия Президенти матбуот котиби “дўст бўлмаган” давлатларга табрик йўлланмаслигини билдирди.
Россия Венгриядаги парламент сайловларида ғалаба қозонган мухолифат етакчиси Петер Мадярни табрикламайди. Бу ҳақда Россия Президенти матбуот котиби Дмитрй Песков маълум қилди.
Песковнинг айтишича, Москва “дўст бўлмаган давлатлар” раҳбарларига табрик йўлламайди. У Венгрия Россияга қарши санкцияларни қўллаб-қувватлаётгани сабабли айнан шундай тоифага киритилганини таъкидлади.
Шу билан бирга, журналистнинг “Бу Москва фақат Венгрия Бош вазири Виктор Орбан билан дўст эканлигини англатадими”, деган саволига жавобан у Россия илгари Венгрия бош вазири Виктор Орбан билан мулоқот олиб борганини қайд этди.
Маълумот учун, Венгрия 2022 йил 5 мартдан буён Россия томонидан “дўст бўлмаган давлатлар” рўйхатига киритилган. Шунга қарамай, ўша йил апрель ойида Владимир Путин Орбанни парламент сайловларидаги ғалабаси билан расман табриклаган эди.
13 апрель куни ўтказилган брифингда Песков Кремль Венгрия халқининг танловига “ҳурмат билан қараши”ни билдириб, янги раҳбарият билан “прагматик алоқаларни давом эттириш” нияти борлигини ҳам қўшимча қилди.
Эслатиб ўтамиз, 12 апрель куни бўлиб ўтган сайловларда ҳукмрон “Фидес” партияси мухолифатдаги “Тиса”га ютқазди.
