Уганда генерали Туркиядан 1 миллиард доллар ва “энг гўзал аёл”ни талаб қилди
Қўмондон Туркияни Сомалидаги инфратузилма лойиҳаларидан фойда кўришда айблади.
Уганда қуролли кучлари бош қўмондони Муҳоози Каинеругаба Туркия билан муносабатлар фонида кескин баёнот билан чиқди. У Туркиядан 1 миллиард доллар миқдорида маблағ ҳамда “энг гўзал аёл”ни рафиқаси сифатида тақдим этишни талаб қилганини маълум қилган. Бу ҳақда ТАСС хабар берди.
Генералнинг таъкидлашича, мазкур талаблар Кампала ва Истанбул ўртасидаги эҳтимолий кескинликларнинг олдини олиш мақсадида илгари сурилган. У, шунингдек, агар ушбу талаблар бажарилмаса, 30 кун ичида Туркия билан дипломатик алоқалар узилиши мумкинлигини билдирган.
Муҳоози Каинеругаба ўз баёнотида Туркияни Сомалидаги инфратузилма лойиҳалари ҳамда минтақадаги иқтисодий фаолият орқали манфаат кўришда айблаган. Унинг фикрича, талаб қилинаётган маблағлар Туркиянинг минтақадаги иштироки учун “хавфсизлик дивиденди” сифатида қаралиши лозим.
Шунингдек, у ижтимоий тармоқлардаги чиқишида Туркиянинг “энг гўзал аёли”ни ўз рафиқаси сифатида тақдим этиш ҳақидаги талабни ҳам билдирган, бироқ мазкур пост кейинчалик ўчириб ташланган.
