Исроил армияси юқори жанговар тайёргарлик ҳолатига ўтказилди — Ynet
Разведка нишонлар рўйхатини кенгайтирмоқда, операциялар тезлаштирилмоқда
Ynet нашри хабарига кўра, Исроил Мудофаа Кучлари бош штаби бошлиғи Эял Замир армияни юқори жанговар тайёргарлик ҳолатига келтириш ва Эронга қарши эҳтимолий ҳарбий ҳаракатларга тайёрланишни буюрган.
Манбаларга кўра, мазкур қарор 11–12 апрель кунлари Исломобод шаҳрида бўлиб ўтган АҚШ–Эрон музокараларининг муваффақиятсиз якунланганидан сўнг қабул қилинган.
Қайд этилишича, Исроил ҳаво кучлари зарба берувчи гуруҳларни эҳтимолий операцияларга тайёрламоқда, разведка эса эҳтимолий нишонлар рўйхатини кенгайтирмоқда. Шу билан бирга, ҳарбий ҳаракатларни қайта бошлаш бўйича якуний қарор ҳали қабул қилинмаган.
Шунингдек, Yedioth Ahronoth нашрининг ёзишича, Исроил армияси операцион жараёнларни тезлаштириш, жавоб бериш вақтини қисқартириш ҳамда жанговар тайёргарликни максимал даражада ушлаб туриш бўйича кўрсатмалар олган.
Ҳарбий манбалар IDF томонидан аввалги ҳарбий тўқнашувлар тажрибасига асосланган соддалаштирилган жанговар протоколлар жорий этилганини ҳам таъкидламоқда.
