Россия Украина низоси чўзилиши фонида Беларусь ҳарбий саноат комплексининг бир қисмидан фойдаланмоқчи. Америка урушни ўрганиш институти (ISW)га кўра, Минск урушда тўғридан-тўғри қатнашмаслик учун ён беришга мажбур бўлмоқда.
Кеча Владимир Путин билан учрашувда Александр Лукашенко Беларусь Су-25 самолётларини ишлаб чиқаришга тайёрлигини айтганди. Унинг фикрича, бу самолёт "Украинада ўзини яхши кўрсатмоқда".
Шунингдек, Беларусь раҳбари МАЗ заводи Россия КамАЗ оғир юк ташувчилари учун эҳтиёт қисмлари ишлаб чиқаришга ўтганини маълум қилган. Бундан ташқари, у электрон компонентлар ишлаб чиқаришда ёрдамга тайёрлигини айтган.
Қўшимча Су-25 ва юк автомобиллари учун эҳтиёт қисмлари ҳарбий ҳаракатлар давомида ўта муҳим аҳамият касб этмаса-да, Кремль Беларусь заводларини қайта жиҳозлаши ва рус армияси муҳтож бўлган техника ишлаб чиқаришда фойдаланиши мумкин. Шу билан бирга, Россия Су-25 самолётларини ишлаб чиқаришни Минскка бериш орқали ўз заводларида бошқа техникаларни ишлаб чиқариши мумкин.
ISW экспертлари фикрича, Кремль интеграция масалалари бўйича Минскка босим ўтказмоқда. Лукашенко эса йиллар давомида инкор қилиб келган пунктлар бўйича кичик ён беришларни давом эттиряпти.