ЙПХ ходимини обрўсизлантирувчи видео тарқатилди: фуқаро 10 суткага қамалди
Судда фуқаро қилган ишидан пушаймонлигини билдириб, айбига иқрор бўлди ва бундай ҳолатни бошқа такрорламаслигини айтди.
Ижтимоий тармоқларда ЙПХ ходимини обрўсизлантирувчи видео тарқатган фуқаро 10 сутка маъмурий қамоқ жазосига ҳукм қилинди.
Маълум бўлишича, фуқаро июнь ойида ЙПХ ходимининг тўхташ ҳақидаги талабига бўйсунмай, ҳаракатни давом эттирган. Ҳолат юзасидан унга нисбатан баённома расмийлаштирилган. Шундан сўнг фуқаро ЙПХ ходими билан боғлиқ видеони ўзининг ижтимоий тармоқдаги саҳифасига жойлаштирган.
Фуқаро қилган ишидан пушаймон эканини билдириб, айбига иқрор бўлган. У ЙПХ ходими ва унинг оила аъзоларидан узр сўраган ҳамда бундай ҳолат бошқа такрорланмаслигини айтган.
Мазкур ҳолат бўйича фуқаронинг ҳаракатларида Маъмурий жавобгарлик тўғрисидаги кодекснинг 195¹²-моддаси биринчи қисмида назарда тутилган ҳуқуқбузарлик аломатлари аниқланган.
2026 йил 24 сентябрь куни жиноят ишлари бўйича Қарши шаҳар суди томонидан фуқаро Рўйиддиновга нисбатан ушбу модда асосида 10 сутка маъмурий қамоқ жазоси тайинланди.
Судда фуқаро ёшларга мурожаат қилиб, бундай хатти-ҳаракатни такрорламасликни сўраган.
