Россия армиясидаги хорижликлар: Украинадаги ҳарбий асирларнинг 10 фоизи чет эл фуқаролари
Улар орасида 55 та давлат вакиллари бор.
2026 йил сентябрь ҳолатига кўра, Украинадаги россиялик ҳарбий асирларнинг қарийб 10 фоизини хорижий давлат фуқаролари ташкил этади. Бу ҳақда «Хочу жить» лойиҳаси хабар берди.
Унга кўра, Россия Қуролли кучлари сафида асирга тушганлар орасида дунёнинг 55 та давлатидан бўлган фуқаролар бор.
Маълумотда 2022 йилдан буён Россия Қуролли кучлари билан шартнома имзолаган қарийб 29 минг нафар хорижликнинг исмлари аниқлангани айтилади. Шунингдек, Россия Мудофаа вазирлиги 2026 йил давомида яна 18 500 нафар хорижликни ҳарбий хизматга жалб қилишни режалаштиргани таъкидланган.
Хабарга кўра, Россия хорижликларни, хусусан, иқтисодий имкониятлари чекланган қатлам вакилларини катта миқдордаги тўловлар ва яхши ҳаёт ваъдалари орқали ҳарбий хизматга жалб қилмоқда. Улар кейинчалик жанговар ҳаракатларнинг хавфли участкаларига юборилаётгани билдирилган.
Шунингдек, айрим давлатлар ҳукуматларининг дипломатик босими ва қаршилигидан сўнг Россия 39 та давлатда хорижликларни ҳарбий хизматга ёллашни тўхтатгани айтилади. Ушбу давлатлар қаторида Хитой, Ҳиндистон, Миср, Кения, Покистон ва Гана ҳам бор.
Маълумотда Россия ҳозирда Жанубий Америка, Марказий Осиё ва Африка давлатларида хорижликларни ёллашга эътиборни кучайтираётгани қайд этилган.
Хусусан, 2026 йилнинг дастлабки 9 ойида Украинада Россия томонида жанг қилган асир хорижликлар сони 2025 йил давомида қайд этилган кўрсаткичдан ошгани таъкидланган.
Улар орасида Аргентина, Панама, Парагвай, Перу, Гондурас, Вьетнам, Монголия ва бошқа давлатлар фуқаролари борлиги айтилмоқда.
Қайд этилишича, мазкур маълумотлар Россия Қуролли кучлари сафида хорижликларни жалб қилиш кўлами ва уларнинг географиясига оид маълумотларга асосланган.
