Россияда мигрантлар учун тиббий кўрик муддати 30 кунгача қисқартирилади
Мажбурий тиббий кўрикдан бўйин товлаган меҳнат муҳожирлари жаримага тортилиши ёки депортация қилиниши мумкин.
Россия Федерацияси меҳнат муҳожирлари учун мажбурий тиббий кўрик тартибларини кучайтирмоқда. Бу ҳақда Россия Давлат Думаси раиси Вячеслав Володин маълум қилди.
Янги тартибларга кўра, Россияга уч ойдан ортиқ муддатга келган чет эл фуқаролари мажбурий тиббий кўрикдан ўтишлари лозим бўлган муддат 90 кундан 30 кунгача қисқартирилади. Тиббиёт муассасалари текширув натижаларини Россия Ички ишлар вазирлигига, юқумли касалликлар аниқланган тақдирда эса Роспотребнадзорга тақдим этиши шарт бўлади.
Мазкур чора-тадбирлар қонунбузарлик ҳолатлари аниқланган тақдирда мигрантларни тезкор тартибда мамлакатдан чиқариб юбориш имконини яратишга қаратилган. Мажбурий тиббий кўрикдан ўтмаган шахсларга нисбатан маъмурий жавобгарлик чоралари, жумладан, жарима ва суд қарори асосида депортация қўлланилиши режалаштирилган.
Шунингдек, мигрантларнинг соғлиғи ҳолатига оид ҳужжатларни қалбакилаштириш жиноят деб баҳоланади.
Вячеслав Володиннинг таъкидлашича, ушбу чоралар мигрантлар устидан назоратни кучайтириш ҳамда жамоат хавфсизлигини таъминлашга хизмат қилади.
