Россияда ўзбекистонлик аёл “Шойгунинг жияни” сифатида фуқароларни алдади
27 ёшли аёл ўзини Россия Хавфсизлик кенгаши котиби Сергей Шойгунинг жияни сифатида кўрсатиб, фуқаролардан криптоинвестиция лойиҳасига сармоя киритишни сўраган.
Московада ҳуқуқни муҳофаза қилувчи органлар 27 ёшли, асли ўзбекистонлик Шерйехон Усмоновани (кейин фамилиясига ўзгартириб, ўзини Шерйе Шойгу деб таништирган) йирик миқдордаги фирибгарликда гумон қилмоқда. У ўзини Россия Хавфсизлик кенгаши котиби Сергей Шойгунинг жияни сифатида кўрсатиб, фуқаролардан криптоинвестиция лойиҳасига сармоя киритишни сўраган.
ТАСС агентлиги хабар беришича, гумон қилинувчи аёл ва унинг турмуш ўртоғи 100 миллион рублдан ортиқ маблағни алдов йўли билан қўлга киритганликда айбланмоқда. Улар инвестиция орқали юқори даромад ваъда қилиб, фуқаролардан катта суммада пул тўплаб, кейин изсиз ғойиб бўлган.
Жабрланувчилар адвокати Саид Ярахмедов маълум қилишича, тергов жараёнида зарар миқдори икки бараварга ошиши, яъни 200 миллион рублга еткинчи мумкин.
Ҳуқуқни муҳофаза қилувчи идоралар Россия Жиноят кодексининг 159-моддаси (фирибгарлик) бўйича жиноят ишини қўзғатиш масаласини кўриб чиқмоқда. Ҳозирда гумон қилинувчи шахслар қидирувда бўлиб, уларнинг хорижга чиқиб кетгани эҳтимоли ўрганилмоқда.
