Хабарларга кўра, Франция ва Италия ўртасида Европа давлатлари қўшинларини Украинага юбориш масаласи юзасидан дипломатик таранглик кузатилмоқда.
Италия бош вазири ўринбосари Маттео Сальвини яқинда Буюк Британия ва Франция ташаббуси билан муҳокама қилинаётган “хоҳловчилар коалицияси” доирасида Италия аскарларини Украинага юбориш режасига кескин қарши чиққан.
Унинг таъкидлашича, “агар керак бўлса, Франция президенти Эммануэль Макроннинг ўзи дубулға кийиб Украинага бориши мумкин”.
Мазкур баёнотдан сўнг Италия элчиси Эммануэла Д’Алессандро Франция Ташқи ишлар вазирлигига чақирилган. Париж расмийлари Сальвининг гапларини икки мамлакат ўртасидаги ишончли ҳамкорлик ва тарихий муносабатларга зид, деб баҳолаган.
Маълум қилинишича, бу Сальвининг Макронга қарши билдирган илк танқиди эмас. Жорий йил март ойида ҳам у Франция президентни “телба” деб атаган ва уни Европани Россия билан кенг кўламли урушга тортаётганликда айблаган эди.