Самарқанд вилоятининг Тайлоқ туманида содир бўлган фожиали йўл-транспорт ҳодисаси бўйича суд ҳукми эълон қилинди. Тергов материалларига кўра, “Lacetti” русумли автомобиль ҳайдовчиси 21 июнь куни соат 19:00 атрофида Дўстлик маҳалласида тезликни ошириб, йўл четида турган болани уриб юборган ва воқеа жойидан қочиб кетган. Жабрланувчи — беш ёшли қиз — олган оғир тан жароҳатлари оқибатида воқеа жойида ҳалок бўлган.
Суд мажлисида эркак ўз айбига иқрор бўлиб, пушаймонлигини билдирган, вафот этган қизнинг оила аъзоларидан кечирим сўраган ҳамда моддий аҳволи оғирлигини кўрсатиб, суддан буни енгиллаштирувчи ҳолат сифатида кўриб чиқишни сўраган.
Суд ҳукмига кўра, ҳайдовчи беш йил олти ой муддатга озодликдан маҳрум этилди ҳамда жазони ўтаб бўлгач, икки йил давомида транспорт воситасини бошқариш ҳуқуқидан маҳрум қилинади.