Туркияда қулаган ракета Эрон билан боғлиқ эмас — Эрон ТИВ
Анқара ҳаво ҳудуди бузилишига қарши чоралар кўришини маълум қилди.
10 март куни Туркия ташқи ишлар вазири Ҳакан Фидан Эрон ташқи ишлар вазири Аббос Ароқчи билан телефон орқали мулоқот қилди. Бу ҳақда TRT Haber нашри хабар берди.
Маълум қилинишича, суҳбат давомида Ҳакан Фидан Туркия ҳаво ҳудудининг бузилиши қабул қилиб бўлмас ҳолат эканини таъкидлаб, Анқара бундай ҳолатларга қарши барча зарур чораларни кўришда давом этишини билдирган.
Шунингдек, Туркия ТИВ раҳбари барча томонларни минтақавий хавфсизликка путур етказиши ва тинч аҳоли ҳаётига хавф туғдириши мумкин бўлган ҳаракатлардан тийилишга чақирган.
Эрон ташқи ишлар вазири Аббос Ароқчи эса Туркия ҳудудига йўналган ракеталар Эрон билан боғлиқ эмаслигини маълум қилиб, ушбу ҳодиса юзасидан кенг қамровли текширув ўтказилишини билдирган.
Аввалроқ Туркия президенти Ражаб Тоййиб Эрдўғон ҳукумат йиғилишидан кейинги чиқишида Эронни вазиятни кескинлаштириши мумкин бўлган хатолардан тийилишга чақирган эди.
