Шавкат Мирзиёев Озарбайжон президентини 60 ёшли юбилейи билан табриклади
Етакчилар Ўзбекистон-Озарбайжон стратегик шериклик ва кўп қиррали ҳамкорлик муносабатлари кун тартибидаги долзарб масалаларни кўриб чиқди.
Ўзбекистон президенти Шавкат Мирзиёев 24 декабрь куни Озарбайжон президенти Илҳом Алиев билан телефон орқали мулоқот қилди.
Бу ҳақда президент Матбуот хизмати хабар берди.
Давлат раҳбари Илҳом Алиевни 60 йиллик юбилейи билан самимий табриклаб, унга мустаҳкам соғлик, фаровонлик ва катта муваффақиятлар, биродар Озарбайжон халқига эса тинчлик-осойишталик ва равнақ тилади.
Савдо-иқтисодий алоқалар ижобий суръат билан ривожланиб бораётгани мамнуният билан қайд этилди: ўзаро савдо кўрсаткичлари барқарор ошиб бормоқда, етакчи корхоналар кооперацияси кенгаймоқда.
Шу ойда Баку шаҳрида саноат кўргазмаси ва ишбилармонлар кенгашининг навбатдаги йиғилиши муваффақиятли ўтказилди.
Икки томонлама маданий-гуманитар дастур доирасида фаол алмашинувлар давом этмоқда.
Давлат раҳбарлари устувор тармоқ ва йўналишларда, шу жумладан машинасозлик, энергетика, қишлоқ хўжалиги, транспорт ва логистика соҳаларида амалий ҳамкорлик бўйича лойиҳаларни жадал илгари суриш муҳим эканини қайд этдилар.
Минтақавий сиёсат ҳамда халқаро ташкилотлар доирасидаги ҳамкорлик масалалари юзасидан ҳам фикр алмашилди.
Бўлажак тадбирлар режаси кўриб чиқилди.
Эслатиб ўтамиз, аввалроқ Ўзбекистон Республикаси Президенти Шавкат Мирзиёев Япония Либерал-демократик партияси етакчиси Фумио Кисидага унинг мамлакат Бош вазири этиб сайлангани муносабати билан табрик йўллагани ҳамда Президент Шавкат Мирзиёев Россия етакчисини таваллуд куни билан самимий табриклагани ҳақида хабар берилганди.
