Ўзбекистон ва Озарбайжон ТИВ раҳбарлари Нахчивондаги дрон ҳужуми масаласини муҳокама қилди
Ўзбекистон томони мазкур ҳужум юзасидан жиддий хавотир билдириб, халқаро ҳуқуқ тамойилларига риоя қилиш зарурлигини таъкидлади.
Бахтиёр Саидов ва Жейхун Байрамов ўртасида телефон орқали мулоқот бўлиб ўтди. Суҳбат давомида Озарбайжоннинг Нахчивон Автоном Республикаси ҳудудида содир бўлган учувчисиз учиш аппарати ҳужуми билан боғлиқ вазият муҳокама қилинди.
Маълум қилинишича, озарбайжонлик вазир ҳамкасбига мазкур ҳудудга қилинган дрон ҳужуми тафсилотлари ҳақида маълумот берган. Ҳужум оқибатида тинч аҳоли жабр кўргани ҳамда фуқаролик инфратузилмасига зарар етгани таъкидланган.
Ўзбекистон томони мазкур ҳодиса юзасидан жиддий хавотир билдирган. Бу ҳақда вазир Бахтиёр Саидовнинг Telegram каналида эълон қилинган баёнотда маълум қилинди.
Унда қайд этилишича, Ўзбекистон томони халқаро ҳуқуқ тамойилларига зид бўлган, бошқа давлатнинг суверенитети ва ҳудудий яхлитлигини бузишга қаратилган ҳаракатларни қабул қилиб бўлмаслигини таъкидлаган.
