Ўзбекистон Президенти Кувайт ва Қатар етакчилари билан телефон орқали мулоқот қилди
Мулоқотда Яқин Шарқдаги вазият кескинлиги ва ҳудуддаги хавфлар муҳокама қилинди.
4 март куни Ўзбекистон Президенти Шавкат Мирзиёев Кувайт Давлати Валияхди Шайх Сабоҳ ал-Холид ал-Хамад ас-Сабоҳ ва Қатар Давлати Амири Шайх Тамим бин Ҳамад Ол Соний билан телефон орқали мулоқот қилди.
Мулоқот давомида Яқин Шарқ минтақасидаги вазиятнинг кескинлашуви, ҳудуддаги турли инфратузилма объектларига берилган зарар ва хавф омиллари юзасидан жиддий ташвиш билдирилди. Томонлар халқаро ҳуқуқ тамойиллари доирасида тинчликни сақлаш ва аҳоли осойишталигини таъминлаш зарурлигини қайд этдилар.
Шавкат Мирзиёев ўз навбатида Ўзбекистон фуқароларининг хавфсизлиги ва уларни Ватанга қайтариш бўйича амалга оширилаётган чора-тадбирлар учун миннатдорлик билдирди.
Томонлар шунингдек, икки томонлама стратегик шериклик ва дўстона муносабатларни мустаҳкамлашга оид масалаларни ҳам муҳокама қилдилар.
Кувайт ва Қатар етакчилари ўз навбатида, синовли кунларда билдирган самимий қўллаб-қувватлаганлик ва бирдамлик сўзлари учун Ўзбекистон Президентига миннатдорликларини изҳор этдилар.
