Шавкат Мирзиёев Доналд Трампга иккита совға берди
Улардан бири Регистрoн мажмуасининг тилла рангдаги макети.
7 ноябрь куни Шавкат Мирзиёевнинг Вашингтонга ташрифи доирасида Ўзбекистон ва АҚШ президентлари учрашуви бўлиб ўтганди. Музокаралар пайтида Шавкат Мирзиёев Дональд Трампга иккита рамзий совға топширди. Бу ҳақдаги маълумот учрашувдан олинган суратларда акс этган.
Суратларда Оқ уйдаги музокаралар столида Самарқанддаги Регистрoн мажмуасининг тилла рангдаги кичик макети жойлашгани кўринади. Бу совға Ўзбекистоннинг тарихий мероси ва маданий қадриятларини ифода этади.
Шунингдек, президент Мирзиёев Трампга унинг ўзи ёзган “The Art of the Deal” (Келишув санъати) китобининг ўзбек тилидаги таржимасини ҳам тақдим этди. Китоб дастлаб 1987 йилда Дональд Трамп ва журналист Тони Швартс томонидан ёзилган бўлиб, у қисман мемуар, қисман бизнес маслаҳатларидан иборат.
Трамп ушбу асарни ўзининг энг муҳим ишларидан бири деб ҳисоблайди ва ҳатто Инжилдан кейинги энг севимли китоби сифатида тилга олган.
