Президент Шавкат Мирзиёев одил судловни таъминлаш масалалари юзасидан тақдимот билан танишди.
Сўнгги йилларда мамлакатимизда суд тизими изчил ислоҳ қилиниб, жазоловчи органдан инсон ҳуқуқларини ҳимоя қилувчи тизимга айлантирилди. Шу жумладан, маъмурий судлар ташкил этилди, оилавий масалалар бўйича махсус судялик корпуси тузилди, маиший зўравонликнинг олдини олишга қаратилган чоралар кўрилди, инвестицион низолар учун алоҳида судлов таркиби жорий қилинди. Ушбу ўзгаришлар фуқаролар томонидан амалда сезилиб, халқаро экспертлар томонидан ижобий баҳоланмоқда.
Тақдимотда судларнинг очиқлиги ва халқчилиги, рақамлаштириш асосида фуқароларга қулайликлар яратиш, юқори малакали суд кадрларини тайёрлаш масалалари муҳокама қилинди.
Хусусан, илғор хорижий тажрибага асосланган “Рақамли суд” концепцияси ишлаб чиқилиб, уни амалиётга татбиқ этиш чоралари белгиланди. Бу тизим коррупцияни камайтиришга, тадбиркор ва фуқароларга овора бўлмасдан адолатли судловга эришиш имконини кенгайтиришга хизмат қилади.
Шунингдек, фуқаролик ва иқтисодий судларда кўрилаётган низосиз даъволарни маъмурий органлар ваколатига ўтказиш, маъмурий ва иқтисодий суд ишларини экстериториал тартибда кўриб чиқиш таклиф этилди.
Судя лавозимининг барқарорлигини таъминлаш мақсадида тайинлаш муддатларини қайта кўриб чиқиш, шунингдек, барча йўналишлардаги судларда ҳудудий тафтиш судларини ташкил этиш ҳам назарда тутилмоқда. Унга кўра, вилоят судларида фақат апелляция ва кассация инстанциялари қолиб, тафтиш инстанциялари бешта минтақавий судда жамланади.
Суд тизими учун кадрлар тайёрлаш масаласи ҳам муҳокама этилиб, Судялар олий мактабини ислоҳ қилиб, унинг негизида Одил судлов академиясини ташкил этиш таклифи билдирилди.
Давлат раҳбари илгари сурилган таклифларни маъқуллаб, тегишли фармонларни имзолади ва вазифаларнинг тизимли ҳамда сифатли ижросини таъминлаш бўйича топшириқлар берди.