Кеча, 10 октябрь куни Исроил ва Ҳамас ўртасида сулҳ кучга киргач минглаб бошпанасиз қолган фаластинликлар вайрон бўлган уйларига қайтишмоқда.
“Улар бизни йўқ қилишди. Аммо биз яна қайтамиз”, — дейди маҳаллий фуқаролардан бири журналистлар билан суҳбатда. Унинг сўзларига кўра, кўпчилик учун уйларига қайтиш — хавфли бўлса-да, зарур қарор. Чунки Ғазо ҳудудида бошпана топиш имкониятлари жуда чекланган.
Вайрона шаҳар кўчаларида сув ва электр таъминоти деярли йўқ, кўпгина бинолар фойдаланишга яроқсиз. Шунга қарамасдан, аҳоли ўз қўли билан уйларини таъмирлашга, қурилиш материалларини топишга ва қайта турмуш бошлашга уринмоқда.
Халқаро ташкилотлар Ғазодаги инсонпарварлик инқирозига эътибор қаратмоқда. Бироқ ёрдам етиб бориши қийин, чунки кўплаб йўллар ёпиқ, хавфсизлик чоралари кучайган.