Сурия Республикаси Президенти муваққат лавозимида турган Аҳмад аш-Шаръа мамлакатнинг АҚШ билан янги ривожланиш стратегиясига асосланган сиёсат олиб бораётганини маълум қилди. Президент Fox News телеканалига берган интервьюсида Сурия ҳозирда Қўшма Штатларнинг геосиёсий иттифоқчиси сифатида қаралишини таъкидлади.
аш-Шаръа сўзларига кўра, АҚШ Сурия ҳудудларига, хусусан, газ соҳасига инвестиция йўналтириш имкониятини кўриб чиқиши мумкин. Шунингдек, Сурия ҳукумати мамлакатнинг иқтисодий ривожланиши ва инфратузилмасини мустаҳкамлашга қаратилган инвестиция истиқболларини муҳокама қилмоқда.
Сурия муваққат ҳукуматининг Ахборот вазири Ҳамза Мустафо маълум қилишича, мамлакат АҚШ бошчилигидаги «ИШИД» террор ташкилотига қарши халқаро коалицияга расмий қўшилди. Бу ҳақда вазир Доналд Трамп ва Сурия Президенти Аҳмад аш-Шаранинг Оқ Уйда ўтказилган учрашувидан сўнг ижтимоий тармоқдаги саҳифасида эълон қилди.
Вазирнинг таъкидлашича, бу қарор орқали Сурия терроризмга қарши курашдаги ҳамкор сифатидаги ўз ролини мустаҳкамлади ҳамда минтақавий барқарорликни қўллаб-қувватлашга ҳисса қўшди. Шу билан бирга, келишувнинг фақат сиёсий характерга эга эканлиги, унда ҳарбий жиҳатлар мавжуд эмаслиги қайд этилди.