Сурия президенти Аҳмад аш-Шаръа АҚШ пойтахти Вашингтонга расмий ташриф билан келди. Бу ҳақда САНА давлат ахборот агентлиги маълум қилди. Ташриф 1946 йилда Сурия мустақилликка эришганидан буён мамлакат етакчисининг АҚШга илк бор расмий ташриф буюриши сифатида тарихга киради.
Маълум қилинишича, Аҳмад аш-Шаръа 10 ноябрь куни Оқ уйда АҚШ президенти Доналд Трамп билан музокаралар ўтказади. Учрашувда икки томонлама муносабатлар, хавфсизлик масалалари ва террорчилик гуруҳларига қарши курашда ҳамкорлик муҳокама қилиниши кутилмоқда.
Аввалроқ, 7 ноябрь куни АҚШ маъмурияти Аҳмад аш-Шаръага қўйилган санкцияларни бекор қилган эди. Шундан бир кун аввал БМТ Хавфсизлик Кенгаши ҳам Сурия президенти бўйича чекловларни олиб ташлашга келишиб олган. Таҳлилчиларга кўра, бу қадам Дамашқ-Вашингтон муносабатларининг илиқлашаётганидан далолат беради.