Ғарбий Сибир транспорт прокуратураси маълум қилишича, Тошкент–Владивосток йўналиши бўйича парвозни амалга ошираётган “Ўзбекистон ҳаво йўллари” авиакомпаниясига тегишли Boeing 767-300 ҳаво кемаси техник носозлик сабабли Красноярск шаҳридаги Д.A. Хворостовский номидаги халқаро аэропортга фавқулодда қўнишни амалга оширган.
Маълумотларга кўра, ҳаво кемасининг қўниши белгиланган тартибда ва хавфсизлик қоидаларига тўлиқ риоя қилинган ҳолда амалга оширилган. Ҳодиса оқибатида жабрланганлар йўқ. Самолёт техник ҳолатини аниқлаш мақсадида вақтинча парвозлардан четлаштирилган.
Шунингдек, Красноярск транспорт прокуратураси парвоз кечиктирилиши муносабати билан йўловчиларнинг белгиланган хизматлардан фойдаланиш ҳуқуқлари таъминланишини назорат қилмоқда.
Аэропорт матбуот хизматининг хабарига кўра, фавқулодда қўниш чоршанба куни амалга оширилган бўлиб, вазият одатий ҳолатда якунланган.
Мазкур ҳолат юзасидан Россия Федерацияси Тергов қўмитасининг Шарқий округ бўйича Красноярск транспорт тергов бошқармаси томонидан Жиноят кодексининг 263-моддаси (ҳаво транспорти хавфсизлиги қоидаларини бузиш) аломатлари бўйича дастлабки тергов ҳаракатлари олиб борилмоқда.