Бугун, 27 январь Осиё бадминтон федерацияси Президенти Ким Жонг Су Ўзбекистон бадминтон федерациясига ташриф буюрди. Юқори мартабали меҳмонни Ўзбекистон бадминтон федерацияси раиси Азиз Абдуҳакимов кутиб олди. Бу ҳақда Экология ва иқлим ўзгариши миллий қўмитаси матбуот хизмати хабар берди.
Ташриф давомида Ким Жонг Су бадминтон спорт иншоотини кўздан кечириб, бу ерда яратилган шарт-шароитлар билан яқиндан танишди. Шунингдек, у ёш бадминтончилар, Ўзбекистон бадминтон терма жамоаси аъзолари ҳамда мураббийлар билан учрашиб, уларнинг тайёргарлик жараёнини кузатди. Учрашув доирасида иқтидорли ёш спортчилар ва терма жамоа аъзолари ўз маҳоратларини намойиш этишди.
Осиё бадминтон федерацияси Президенти 2025 йил сентябрь ойида Тошкент шаҳрида ўтказилган бадминтон бўйича Марказий Осиё чемпионати юқори савияда ташкил этилганини алоҳида таъкидлади.
Маълумот учун, 15–23 сентябрь кунлари бўлиб ўтган мазкур чемпионатда Ўзбекистон, Тожикистон, Туркманистон, Қозоғистон, Қирғизистон, Эрон ва Мўғулистондан спортчилар иштирок этди. Мусобақада Ўзбекистон бадминтончилари муносиб натижалар қайд этиб, мамлакатда ушбу спорт тури изчил ривожланаётганини тасдиқлашди.
Ташриф доирасида Ўзбекистон бадминтон федерацияси раиси ва Осиё бадминтон федерацияси Президенти ўртасида ҳамкорлик тўғрисидаги келишув имзоланди. Ушбу ҳужжат бадминтон спортини тизимли ривожлантириш, спорт инфратузилмасини мустаҳкамлаш, спортчилар ва мураббийлар тайёрлаш тизимини модернизация қилиш ҳамда миллий бадминтон тизимини халқаро спорт майдонига интеграция қилишга қаратилган.
Келишув доирасида ҳудудларда ихтисослаштирилган спорт мактабларини ривожлантириш, спортчилар тайёрлаш дастурларини янгилаш, хорижий мутахассисларни жалб этиш, халқаро мусобақалар ва йиғинларда иштирокни кенгайтириш, шунингдек, Ўзбекистон ҳудудида халқаро бадминтон турнирларини ташкил этиш белгиланди.
Ташриф якунида федерация раҳбарлари ва спортчилар дўстлик ва ҳамкорлик рамзи сифатида ўзаро беллашувларда иштирок этишди. Томонлар келгусида Ўзбекистонда бадминтон бўйича халқаро турнирлар ўтказиш бўйича келишувга эришди.