Тошкентда “Долзарб 20 кунлик” тадбирлари бошланганидан бери 270 та жиноят фош этилди. Бу ҳақида шаҳар ИИББ маълум қилди.
Қайд этилишича, 117 та гиёҳвандлик воситалари билан боғлиқ ҳолатда 4 килограмм 578 грамм тақиқланган моддалар, 1000 та психотроп дори воситалари аниқланган.
Шунингдек, Шайхонтоҳур туманида ўз уйида гиёҳвандлик воситаларини сақлаб келаётган шахс аниқланган. Бунда фуқаро жиноят-қидирув бўлими тезкор ходимига аниқланган вазият юзасидан чора кўрмаслик учун 10 минг доллар пора таклиф қилган.
Шундан сўнг, тегишли билдирги асосида тезкор тадбир ўтказилиб, фуқаро пулларни пора тариқасида берган вақтида қўлга тушган.
Ушбу ҳолат юзасидан Жиноят кодексининг пора беришни назарда тутувчи моддаси билан жиноят иши очилган.