Тошкент шаҳрида ўзини йирик дистрибютор ва тадбиркор сифатида таништириб, фуқароларнинг ишончига кирган ҳолда уларни катта миқдорда пул маблағларига чалғитган шахс қўлга олинди. Бу ҳақда Тошкент шаҳар Ички ишлар бош бошқармаси матбуот хизмати хабар берди.
Маълум қилинишича, 1986 йилда туғилган Хайрулло Шокиров Инстаграм, Телеграм ҳамда YouTube ижтимоий тармоқлари орқали фаолият юритиб, ўзини хориждан анор шарбати ва салқин ичимликларни катта ҳажмда импорт қилувчи ҳамда уларни мамлакатдаги савдо тармоқларига етказиб бериш ҳуқуқига эга дистрибютор сифатида кўрсатган.
У фуқароларга юқори даромад ваъда қилиб, уларнинг ишончини қозонган ҳамда алдов ва ишончни суиистеъмол қилиш йўли билан жуда кўп миқдордаги пул маблағларини ўзлаштирган. Натижада бир қатор фуқароларга катта миқдорда моддий зарар етказилган.
Мазкур ҳолат юзасидан Хайрулло Шокировга нисбатан Жиноят кодексининг 168-моддаси 4-қисми «а» банди — жуда кўп миқдорда фирибгарлик содир этиш аломатлари билан жиноят иши қўзғатилган. Суд қарорига асосан, унга нисбатан қамоққа олиш тарзидаги эҳтиёт чораси қўлланган. Ҳозирда тергов ҳаракатлари давом этмоқда.
Тошкент шаҳар ИИББ фуқароларга мурожаат қилиб, агар ушбу шахснинг ноқонуний ҳаракатларидан жабр кўрган бўлса ёки иш юзасидан қўшимча маълумотларга эга бўлса, ҳуқуқни муҳофаза қилувчи органларга мурожаат қилишни сўради. Қонунчиликка мувофиқ, жуда кўп миқдорда фирибгарлик учун катта жарима ёки 8 йилдан 10 йилгача озодликдан маҳрум этиш жазоси белгиланган.