Тошкентнинг Шайхонтоҳур туманида уйни ижарага берувчи эркак бегона аёлга нисбатан тегажоғлик қилгани учун маъмурий жазога тортилди.
Суд ҳужжатларига кўра, эркак ҳисоблагични текшириш баҳонасида ёш оилага ижарага берган уйга келган. У ерда 22 ёшли К.З. ёлғиз эканини ва унинг турмуш ўртоғи ишда эканини билган ҳолда, унга номақбул таклифлар қилган.
Аёл бақирган ва ўзини ҳимоя қилиш учун пичоқ олган, шундан кейин қўшнилар унинг бақирганини эшитиб, мазкур уйга киришган.
Суд мажлисида уй эгаси ҳисоблагич кўрсаткичларини текшириш учун келганини тан олган, лекин тегажоғликни инкор этган ва суддан енгиллик сўраган.
Суд уни МЖтКнинг 41-1-моддаси 1-қисми бўйича айбдор деб топди ва 5 сутка маъмурий қамоқ жазосини тайинлади.